1 Феврал 2021 йил 1058

“Buhara News” телеграм ижтимоий тармоғида “Вобкент туманидаги ҳайдовчи, уни тўхтатмоқчи бўлган ГАИ ходимини машинасининг капоти устида “сайр қилдирди” сарлавҳаси остида эълон қилинган 15 сонияли видеолавҳа юзасидан расмий маълумот

Мазкур ҳолат Бухоро вилояти Ички ишлар бошқармаси томонидан ўрганилганда аниқланишича, 2021 йил 29 январь куни соат 15.30да, Бухоро вилояти ИИБ ЙҲХБ бошлиғи томонидан тасдиқланган “Алоҳида йўл-патруль хизмати отряди 3-сафарбарлик гуруҳи ЙПХ нарядларини хизматга жойлаштириш қайдномаси”га асосан, Бухоро вилояти ИИБ Йўл ҳаракати хавфсизлиги бошқармаси йўл-патруль хизмати отряди учинчи сафарбар гуруҳ йўл-патруль хизмати катта инспектори кичик сержант Ш.Р. Вобкент тумани ҳудудида йўл ҳаракати хавфсизлигини таъминлаш мақсадида хизматга жалб қилинганлиги, хизматни олиб бориш жараёнида Вобкент тумани Ўба Кулолон маҳалласи Кулолчи кўчасида фуқаро М.С., таниши Н.А. га тегишли бўлган “Тико” русумли, автомашинада светофорнинг қизил чироғига тўхтамасдан ҳаракатланиб келганлиги сабабли, ЙПХ инспектори йўлнинг қатнов қисмига чиқиб ҳайдовчига тўхташ ишорасини кўрсатганида, фуқаро М.С. ЙПХ инспектори турган йўналишда бошқаришни давом эттириб, содир этган ҳуқуқбузарлиги учун жавобгарликдан қутилиб қолиш мақсадида автомашинани тўхтатмасдан ходимга жуда яқин масофага қадар бошқариб бориши оқибатида ходим  йўл чеккасига қочишга улгурмасдан, автомашина капоти устига чиқиб қолган. Шундай бўлсада ҳайдовчи М.С. автомашина билан ҳаракатланишда давом этиб, тахминан 50-60 метр масофада инспекторни транспорт воситаси капоти устида олиб юриб тўхтаган.

Шундан сўнг ЙПХ инспектори ҳайдовчига нисбатан маъмурий баённома расмийлаштириб, автомашинани “Жарима майдони”га жойлаштирилган.

Ҳозирда мазкур ҳолат юзасидан туман прокуратураси томонидан терговга қадар текширув ҳамда вилоят Ички ишлар бошқармаси томонидан хизмат текшируви ўтказилмоқда.

Юқоридаги ҳолатда бирор кишига тан жароҳати етказилмаган.

Text to speech