2024 йилнинг 19 октябр куни Ички ишлар бошқармаси бошлиғининг биринчи ўринбосари полковник Баҳодирхўжа Шарипов, вилоят Ички ишлар бошқармасидан туманга бириктирилган масъуллар, Бухоро тумани ички ишлар бўлими раҳбарияти ҳамда барча шахсий таркиб иштирок этган йиғилишда туман Ички ишлар бўлими ходимлари томонидан жорий йилнинг 3-чораги якуни бўйича амалга оширилган ишлар, йўл қўйилган камчиликлар ҳамда келгусида жиноятчилик ва ҳуқуқбузарликлар профилактикаси борасида амалга оширилиши лозим бўлган долзарб вазифалар муҳокама қилинди.

Бунда, туман ҳудудида жорий йилнинг ўтган даври мобайнида содир этилган жиноятлар, уларнинг келиб чиқиш сабаб ва омиллари, келгусида "Маҳаллабай" тизим асосида жиноят ва ҳуқуқбузарликларни олдини олиш борасида амалга оширилиши лозим бўлган ишлар, шахсий таркиб ўртасида ижро ва хизмат интизомини мустаҳкамлаш, хизмат интизоми ва қонунийликка риоя қилиш билан боғлиқ салбий ҳолатларни олдини олиш борасида йўл қўйиб келинаётган тизимли камчиликлар бирма бир таҳлил қилинди.

Танқидий ва таҳлилий тарзда ўтган муҳокама йиғилишида, ҳар бир масала юзасидан масъулларнинг ҳисоботлари тингланиб, амалга оширилган иш натижалари бирма-бир кўриб чиқилди ва камчиликларга йўл қўйган раҳбар ҳамда масъул ходимларга нисбатан интизомий таъсир чораларини қўллаш ва юқори натижаларга эришган ходимларни рағбатлантириш юзасидан тегишли қарорлар қабул қилинди.

Йиғилиш якунида келгусида амалга оширилиши лозим бўлган чора-тадбирлар юзасидан ишлаб чиқилган йўл харитасининг манзилли ижросини таъминлаш, айниқса қизил тоифали маҳаллаларда жиноят ва ҳуқуқбузарликларни олдини олиш борасида кенг қамровли профилактик тадбирларни жадаллаштириш, бундан ташқари, шахсий таркиб ўртасида ижро ва хизмат интизомини мустаҳкамлаш, қонунийликка риоя қилиш, бунда ўрта бўғин раҳбарларининг масъулиятини янада ошириш борасида кўрсатма ва топшириқлар берилди.

Берилган топшириқларнинг ижроси эса алоҳида назоратга олинди.

Бу каби муҳокама йиғилишлари тасдиқланган график асосида бошқа ҳудудий ички ишлар органларида ҳам ўтказилмоқда.