Бухоролик 1975 йилда туғилган Т.С. исмли шахс аҳоли орасида моддий жиҳатдан яхши таъминланган шахс сифатида танилган.

Бу шахснинг тадбиркорлик фаолияти билан шуғулланиб, катта даромадга эга эканлиги ва моддий жиҳатдан яхши таъминланганлигидан хабардор бир неча шахслар олдиндан жиноий тил бириктириб, ундан товламачилик йўли билан пул ундириш пайига тушишади.

Шу мақсадда, уни таниган 1962 йилда туғилган Б.С. ўзининг жиноий шериклари, акаси 1960 йилда туғилган Б.И. ҳамда 1992 йилда туғилган Т.С. ҳамда 1983 йилда туғилган Ш.Д. исмли спортчи йигитлар билан бир гуруҳ бўлиб, олдиндан жиноий тил бириктириб, жабрланувчидан пул ундириш режасини тузиб, вазифаларни ўзаро тақсимлаб олишади.

Бунда, жабрланувчининг ишхонасига қўшни қурилиш фирмасида қоровул бўлиб ишлаб келаётган Б.И. жиноий тўда аъзоларини кунлик маълумотлар билан таъминлаб, унинг қайси вақт ишга келиши ва ишдан кетиши, қай русумдаги автомашиналар билан юриши, ёнида кимлар бўлиши ва бошқа шу каби маълумотларни етказиб туради.

Жиноий гуруҳнинг қолган иштирокчилари эса, гумон қилинувчи Ш.Д.нинг бошқарувида бўлган Каптива русумли автомашинада бир неча кун давомида жабрланувчининг автомашинаси орқасидан кузатиб, зарурий маълумотлар тўплашади.

Жиноий режа обдон ўйлаб чиқилиб, жабрланувчини қўрқитиш мақсадида ТОЗ русумли қирқма ўқ отар қурол ҳам тайёрлаб қўйилади.

2021 йил 4 март куни гумон қилинувчи Б.С. ўзининиг жиноий шериклари Т.С. ҳамда Ш.Д. лар билан биргаликда, Ш.Д.нинг Каптива русумли автомашинасида жабрланувчининг бошқарувида бўлган Каптива русумли автомашинани соат 17:10 ларда, А-380 автомобиль йўлида тўхтатиб, автомашина салонига ўтиради ва олдиндан тайёрланган ёнида олиб келган “ТОЗ” русумли қирқма ўқ отар қуролни ўқтаб, уни ўлдириш учун буюртма тушганлигини, буюртмани бажарса 50.000 АҚШ доллар миқдорида хизмат ҳақи олишини, агарда буюртмачи томонидан бериладиган суммадан ортиқроқ пул берса, уни ўлдирмасдан, буюртма берган шахслар тўғрисида маълумот беришини, бунинг эвазига 70.000 АҚШ доллар пул талаб қилиб, жабрланувчини ўз мулкини беришга мажбур қиладиган шароитга солиб қўяди.

Жабрланувчи товламачининг талабига рози бўлиб, икки кун мухлат сўраган ҳолда жиноятчиларнинг қўлидан қутулиб, жорий йилнинг 5 март куни Бухоро вилояти Ички ишлар бошқармаси бошлиғига мурожаат қилади ва ўз аризасида унга нисбатан товламачилик қилаётган шахсларга нисбатан қонуний чора кўришни сўрайди.

Жабрланувчининг аризаси ва берган маълумотларига асосан Бухоро вилояти Ички ишлар бошқармаси Жиноят қидирув бошқармаси томонидан тергов-тезкор гуруҳ тузилиб, кечиктириб бўлмас терговга қадар текширув ҳаракатлари олиб борилди.

Жорий йилнинг 6 март кунидан 7 март кунига ўтар кечаси ўтказилган тезкор тадбирда Б.С. нинг топшириғига асосан унинг акаси, жиноий гуруҳ аъзоси Б.И. кимёвий ишлов берилган миллий сўмга нисбати 522.000.000 сўм бўлган, 50.000 АҚШ доллар пулларни жабрланувчидан олаётган вақтда ашёвий далиллар билан қўлга олинди.

Жиноий гуруҳ ташкилотчиси Б.С. дан эса бир дона "ТОЗ" русумли қирқма ўқ отар қурол, 6 дона жанговар патронлар, жиноий гуруҳнинг яна бир аъзоси Т.С. дан эса бир дона совуқ қурол ҳисобланган пичоқ ашёвий далил сифатида ҳужжатлаштириб олинди.

Ҳозирда мазкур ҳолат юзасидан вилоят Ички ишлар бошқармаси Тергов бошқармаси томонидан жиноий гуруҳ аъзоларига нисбатан Ўзбекистон Республикаси ЖКнинг 165-модда 3-қисми билан жиноят иши қўзғатилиб, қамоққа олиш тарзидаги эҳтиёт чораси қўлланилган ҳолда дастлабки тергов ҳаракатлари давом эттирилмоқда.