Бугунги кунда оммавий ахборот воситалари ва интернет тармоқларида виртуал фирибгарлик ва ўғирлик жиноятлари ҳақида қатор тарғибот ва ташвиқот ишлари олиб борилиб, фуқароларимиз огоҳликка чақирилмоқда.

Бироқ ушбу огоҳлантиришлардан ўзларига тегишли хулоса чиқармаган, осон бойлик орттиришни мақсад қилган айрим фуқароларимиз фирибгар ва ўғриларнинг “қармоғига” илинмоқдалар.

Жумладан, 2021  йилнинг 05 июнь куни соат 23:53 ларда, Когон шаҳар Бухорошоҳ кўчасида яшовчи, 1999 йилда туғилган О.Г. исмли қиз, ўз уйидан туриб, Олот тумани Мухтор маҳалласида яшовчи, 1987 йилда туғилган Қ.С. исмли йигит билан телеграмм тармоғи орқали боғланиб, унга  “Асака банк” орқали ойлик иш хақисиз, кафилсиз, 5 фоиз устама тўлов билан 12.000.000 сўм пулни қарзга олиб беришни ваъда қилиб, гаров сифатида олдиндан 10 фоиз пулни пластик картасига ўтказиб беришга ишонтириб, Қ.С.нинг пластик карта махфий коди ва рақамини олишга эришиб, картада мавжуд жами 1.100.000 сўм пулларни ечиб олиб фирибгарлик жиноятини  содир қилган.

Мазкур ҳолат юзасидан О.Г.га нисбатан Когон шаҳар ИИБ ҳузуридаги Тергов бўлинмаси томонидан Ўзбекистон Республикаси ЖК.нинг 168-моддаси (фирибгарлик) 1-қисми билан жиноят иши қўзғатилиб, ушбу шахснинг вилоятимиз бошқа ҳудудлари, қолаверса республикамиз бўйлаб бошқа шу каби содда фуқароларга нисбатан ҳам фирибгарлик ёки ўғрилик жиноятларини содир қилган-қилмаганлигини аниқлаш борасида дастлабки тергов, тезкор-техник ва суриштирув ҳаракатлари олиб борилмоқда.

Ҳурматли фуқаролар!

Ижтимоий тармоқларда фаол бўлган ватандошлар!

Ижтимоий тармоқлар орқали эълон қилинаётган ютуқли ўйинлар, виртуал спорт мусобақалари ва қимор ўйинлари, турли хилдаги акциялар, электрон савдолар, электрон банк кредитлари ва фоизсиз қарз расмийлаштириш билан боғлиқ ҳамда шунга ўхшаш бир қатор фирибгарлик ва ўғрилик ҳолатларига дучор бўлмаслик учун, сир сақланиши лозим бўлган пластик карта рақамларини, махфий коди ёки паролини бировга ошкор қилманг, суратга тушириб ёки оғзаки тарзда маълум қилманг!