Вобкент туманида ўзаро ҳамкорлик меморандумига кўра жиноят ва ҳуқуқбузарликларни олдини олишга қаратилган чора-тадбирлар олиб борилди
Аввал хабар берганимиздек, вилоят Ички ишлар бошқармаси ҳамда Бухоро давлат университети ўртасида “Вояга етмаганлар, ёшлар ва хотин-қизлар орасида жиноят ҳамда ҳуқуқбузарликларни олдини олишга қаратилган чора-тадбирлар” хусусида имзоланган ўзаро ҳамкорлик меморандумида белгиланган вазифаларни амалга ошириш ишларига алоҳида аҳамият қаратилмоқда.
Жумладан, ташкил этилган ишчи гуруҳ аъзолари томонидан Вобкент туманида муқаддам судланган, профилактик ҳамда пробация ҳисобларида турган хотин-қизлар, ёшлар ва вояга етмаганларга ҳуқуқий, ижтимоий-психологик ёрдам кўрсатиш ишлари олиб борилди.
Бунда, туманда вояга етмаганлар ва ёшлар ўртасида содир этилаётган жиноятларнинг сабаб-оқибатларини илмий-амалий тадқиқ этиш, жиноятларни келтириб чиқарувчи омиллар социал-психологик жиҳатдан бирма-бир ўрганилди.
Шунингдек, вояга етмаганлар билан учрашув ташкил этилиб, малакали психолог мутахассислар томонидан ҳар бир тоифадаги шахс билан индивидуал суҳбатлар олиб борилди. Содир этилган жиноятлар ва уларнинг сабаб-оқибатлари батафсил таҳлил қилиниб, ҳар бир шахсга малакали мутахассислар томонидан ижтимоий-психологик хизматлар кўрсатилди.
