Buxoro viloyati 3-sektor rahbari, Ichki ishlar boshqarmasi boshlig‘i polkovnik Shuxrat Aliyev, viloyat hokimi va Xalq qabulxonasi tomonidan tasdiqlangan reja asosida joriy yilning 8 fevral kuni Qorako‘l tumani markazidan 20 km uzoqlikda joylashgan "Arna" mahallasida sayyor qabul o‘tkazdi.

Sayyor qabulda tuman hokimi va sektor rahbarlari, viloyat va tuman 3-sektor ishchi guruhi aʼzolari, boshqa mutasaddi idoralar masʼullari, mahallaning boshqaruv ofisi xodimlari hamda ushbu mahallaga biriktirilgan iqtisodiy sektor masʼullari, mahallaga biriktirilgan hokim yordamchisi va yoshlar yetakchisi ishtirok etdilar.

Dastlab, viloyat va tuman 3-sektor ishchi guruhi aʼzolaridan iborat ishchi guruh aʼzolari tomonidan mahallada o‘rganishlar olib borilib, mavjud elektr energiyasi, gaz va ichimlik suvi taʼminoti bilan bog‘liq muammolar ko‘zdan kechirildi hamda aniqlangan muammolarni bartaraf etish choralari ko‘rildi.

Masʼullar tomonidan 80 ga yaqin mahalla fuqarolari va faollari tomonidan bildirilgan ijtimoiy-iqtisodiy masalalar, shuningdek, 20 dan ortiq fuqarolardan kelib tushgan turli masalalardagi murojaatlar birma-bir ko‘rib chiqildi.

Murojaatlarning aksariyati joyida bartaraf etilib, mahallada “sohabay”, “mahallabay” va “fuqarobay” ish samaradorligini oshirish, aniqlangan ijtimoiy masalalarni bartaraf etish yuzasidan sektor rahbarlari va tegishli idoralar masʼullariga topshiriqlar berildi va murojaatlar yechimi bo‘yicha aniq muddatlar belgilandi.

Ish yurituviga olingan, qo‘shimcha tekshirish va muddat talab qiladigan murojaatlar ijrosi alohida nazoratga olinib, mutasaddilarga har bir yo‘nalish bo‘yicha ko‘rsatmalar berildi.

Sayyor qabul davomida 1 nafar fuqaroga nogironlar aravachasi, surunkali kasallik bilan davolanayotgan 4 nafar fuqarolarga zaruriy dori darmon vositalari, 2 nafar yoshlar daftariga kiritilgan fuqarolarga tikuv mashinasi etkazib berildi.

Shuningdek, mahallaning 2 km. ichki yo‘llariga shag‘al yotqizilib, yana 5 km. yo‘llarini shag‘allashtirish ishlari davom ettirilmoqda.

Mahalla aholisiga grafikdan tashqari suyultirilgan gaz balonlari ham tarqatildi.