Ko‘p yillik qadriyatimizga aylangan Navro‘zi olam kishiga o‘zgacha ko‘tarinkilik baxsh etadi. Yasharish, yangilanish shodiyonasi munosabati bilan aholiga qulaylik yaratish, ularning oziq-ovqat hamda qishloq xo‘jaligi mahsulotlariga bo‘lgan ehtiyojini hamyonbop narxlarda taʼminlash hamda narx-navoning sunʼiy oshishiga yo‘l qo‘ymaslik maqsadida Buxoro viloyati Ichki ishlar boshqarmasi tashabbuskorligida viloyat bo‘ylab shahar-tuman 3-sektorlariga qarashli barcha mahallalarda belgilangan grafik asosida arzonlashtirilgan oziq-ovqat yarmarkasi tashkil etilmoqda.

Jumladan bugun, joriy yilning 24 mart kuni ham viloyat 3-sektoriga qarashli 26 ta mahallalarda yarmarkalar tashkillashtirililib, mazkur yarmarkalarda savdo peshtataxlari go‘sht, kartoshka, piyoz, sabzi, tuxum, shakar, o‘simlik yog‘i kabi 32 turdagi sifatli, arzon meva, sazbavot va oziq-ovqat mahsulotlari bilan to‘ldirildi.

Narxlarning barqaror va hamyonbopligi aholiga ko‘tarinki kayfiyat ulashdi.

Taʼkidlash joizki, tashkil etilgan ushbu yarmarkalarda bir kunda 15 tonnadan ortiq birlamchi oziq-ovqat mahsulotlari xaridorlarga arzon narxlarda yetkazib berildi.

Aholining talablari va ehtiyojiga qarab mahallalarda tashkil etilgan yarmarkada bir kunda qariyb 4 tonna kartoshka, 3 tonnaga yaqin mol va qo‘y go‘shti, 600 kg shakar, yarim tonna piyoz, 600 kg sabzi kabi birlamchi oziq-ovqat mahsulotlari xarid qilingan.

Shuningdek, 3-sektorlarda tuzilgan ishchi guruhlar tomonidan hududlar bo‘ylab barcha dehqon bozorlarida arzonlashtirilgan oziq-ovqat mahsulotlari yarmarkalarining uzluksiz faoliyat yuritishi hamda talab yuqori bo‘lgan oziq-ovqat mahsulotlari narxlarning sunʼiy ravishda oshirilishiga yo‘l qo‘ymaslik uchun tegishli nazorat tadbirlari ham olib borilmoqda.

Shu o‘rinda, viloyat kesimida shahar va tumanlar 3-sektor rahbarlari boshchiligida ichki ishlar organlarining profilaktika inspektorlari va sohaviy xizmat xodimlari boshqa nazorat organlari bilan hamkorlikda hududlarda oziq-ovqat va boshqa turdagi mahsulotlarning narxlarini sunʼiy oshishini oldini olish maqsadida tadbirkorlar o‘rtasida muntazam ravishda tushuntirish ishlarini ham olib borishmoqdalar.

Joylarda oziq-ovqat mahsulotlari yarmarkalari davom etmoqda.