Бугун, 4 сентябрь куни бутун мамлакатимизда бўлгани каби вилоятимиздаги мавжуд 576 та умумтаълим ва хусусий мактабларда биринчи қўнғироқ тадбирлари кўтаринки руҳда ташкиллаштирилди.

“Билимлар куни” доирасидаги мазкур тадбирларда Бухоро вилоятининг барча шаҳар ва туманларидаги 3-сектор раҳбарлари ҳам иштирок этишиб, ўқувчиларни янги ўқув йили бошланиши муносабати билан табриклашди.

Ички ишлар бошқармаси бошлиғи подполковник Икромжон Турсунов ҳам Ғиждувон туманининг 67-сонли умумтаълим мактабида ўтказилган “Билимлар куни” тадбирида иштирок этди.

Тантанали тадбирда сўзга чиққан бошқарма бошлиғи Мустақиллигимизнинг қутлуғ 33 йиллик айёми, шунингдек, янги ўқув йили билан таълим маскани ўқитувчи ва ўқувчилари ҳамда ота-оналарни табриклади.

Вилоят 3-сектор раҳбари сўнгги йилларда мактаб таълими соҳасидаги ислоҳотларга тўхталиб, Президентимиз ташаббуси билан таълим-тарбия тизимини ривожлантириш давлат сиёсати даражасига кўтарилганлигини, фарзандларимизнинг жаҳон андозаларига мос шароитларда замонавий билим ва касб-ҳунарларни эгаллашлари, жисмоний ва маънавий жиҳатдан етук инсонлар бўлиб вояга етишларини таъминлаш, уларнинг қобилият ва истеъдоди, интеллектуал салоҳиятини рўёбга чиқариш, ёшларимиз қалбида она юртга садоқат ва фидойилик туйғуларини камол топтириш борасида улкан ишлар амалга оширилаётганини аҳоҳида таъкидлади.

Айни ислоҳотлар Бухорода ҳам ўзининг ижобий самарасини бермоқда. Мактабларни янги ўқув йилига тайёрлаш борасида жорий йилда вилоятимиздаги 39 та мактабларда 4,4 млрд. сўмлик кенг кўламли қурилиш-таъмирлаш ишлар амалга оширилди.

Мактабларнинг моддий-техник базасини мустаҳкамлаш билан бирга таълим сифати ва педагог кадрлар салоҳиятини ошириш масаласи ҳам алоҳида назоратга олинган.

Ўтган ўқув йилида Бухоро вилояти бўйича 22 мингга яқин ўқувчилар мактабни битириб, уларнинг 11 мингдан ортиғи олий таълим муассасаларига ўқишга кирди.   

Энг қувонарлиси, вилоятимиз мактаб битирувчиларининг олий таълим муассасаларига ўқишга кириш кўрсаткичи республикада 51 фоизни ташкил этиб, фахрли 1-ўринни олди.

Шундан сўнг, намунали ўқитувчи ва ўқувчиларга бошқарма бошлиғининг ташаккурномаси ҳамда эсдалик совғалари тақдим этилди.