Bugun, 4 sentyabr kuni butun mamlakatimizda bo‘lgani kabi viloyatimizdagi mavjud 576 ta umumtaʼlim va xususiy maktablarda birinchi qo‘ng‘iroq tadbirlari ko‘tarinki ruhda tashkillashtirildi.

“Bilimlar kuni” doirasidagi mazkur tadbirlarda Buxoro viloyatining barcha shahar va tumanlaridagi 3-sektor rahbarlari ham ishtirok etishib, o‘quvchilarni yangi o‘quv yili boshlanishi munosabati bilan tabriklashdi.

Ichki ishlar boshqarmasi boshlig‘i podpolkovnik Ikromjon Tursunov ham G‘ijduvon tumanining 67-sonli umumtaʼlim maktabida o‘tkazilgan “Bilimlar kuni” tadbirida ishtirok etdi.

Tantanali tadbirda so‘zga chiqqan boshqarma boshlig‘i Mustaqilligimizning qutlug‘ 33 yillik ayyomi, shuningdek, yangi o‘quv yili bilan taʼlim maskani o‘qituvchi va o‘quvchilari hamda ota-onalarni tabrikladi.

Viloyat 3-sektor rahbari so‘nggi yillarda maktab taʼlimi sohasidagi islohotlarga to‘xtalib, Prezidentimiz tashabbusi bilan taʼlim-tarbiya tizimini rivojlantirish davlat siyosati darajasiga ko‘tarilganligini, farzandlarimizning jahon andozalariga mos sharoitlarda zamonaviy bilim va kasb-hunarlarni egallashlari, jismoniy va maʼnaviy jihatdan yetuk insonlar bo‘lib voyaga yetishlarini taʼminlash, ularning qobiliyat va isteʼdodi, intellektual salohiyatini ro‘yobga chiqarish, yoshlarimiz qalbida ona yurtga sadoqat va fidoyilik tuyg‘ularini kamol toptirish borasida ulkan ishlar amalga oshirilayotganini ahohida taʼkidladi.

Ayni islohotlar Buxoroda ham o‘zining ijobiy samarasini bermoqda. Maktablarni yangi o‘quv yiliga tayyorlash borasida joriy yilda viloyatimizdagi 39 ta maktablarda 4,4 mlrd. so‘mlik keng ko‘lamli qurilish-taʼmirlash ishlar amalga oshirildi.

Maktablarning moddiy-texnik bazasini mustahkamlash bilan birga taʼlim sifati va pedagog kadrlar salohiyatini oshirish masalasi ham alohida nazoratga olingan.

O‘tgan o‘quv yilida Buxoro viloyati bo‘yicha 22 mingga yaqin o‘quvchilar maktabni bitirib, ularning 11 mingdan ortig‘i oliy taʼlim muassasalariga o‘qishga kirdi.   

Eng quvonarlisi, viloyatimiz maktab bitiruvchilarining oliy taʼlim muassasalariga o‘qishga kirish ko‘rsatkichi respublikada 51 foizni tashkil etib, faxrli 1-o‘rinni oldi.

Shundan so‘ng, namunali o‘qituvchi va o‘quvchilarga boshqarma boshlig‘ining tashakkurnomasi hamda esdalik sovg‘alari taqdim etildi.