Бугун вилоят 3-сектор раҳбари Икромжон Турсунов бошчилигидаги масъуллар, Давлатимиз раҳбарининг "2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш чора-тадбирлари тўғрисида" ги 1-сонли Қарори ижроси юзасидан секторга қарашли Вобкент туманининг "Хайробод" маҳалласида бўлди.

Туманнинг 3-секторига қарашли "Хайробод" маҳалласи мазкур қарор асосида танлаб олинган 4 та оғир маҳаллалардан бири бўлиб, бугунги кунда ушбу маҳаллани ижтимоий-иқтисодий ривожлантириш, коммуникация тармоқлари, инфратузилма ҳолатини яхшилаш, аҳолини қийнаб келаётган тизимли муаммоларни ҳал этиш, "Рақамлашган, обод ва хавфсиз маҳалла" тамойили асосида кенг кўламли тозалаш-ободонлаштириш, қурилиш-таъмирлаш, бунёдкорлик ишлари амалга оширилмоқда.

Ҳудудий сектор раҳбарлари ва ушбу маҳалла еттилиги иштирокида ўтказилган ўрганишлар давомида Бошқарма бошлиғи кўчама-кўча, хонадонма-хонадон юриб, маҳалла фаоллари ва аҳоли билан мулоқот ўтказди ва жараёнда аҳолини қийнаб келаётган мавжуд ижтимоий-маиший муаммоларни бирма бир ўрганиб, уларни бартараф этиш борасида топшириқлар берди.

Президентимизнинг "Камбағалликдан фаровонлик сари" Дастури, шунингдек, "Сайхунобод", "Уйчи", "Зарбдор" ва "Ғиждувон" туманлари тажрибалари асосида аҳолининг доимий даромад манбаини ошириш, бир кўча бир махсулот тамойили асосида маҳалла драйверини яратиш, хонадонларнинг томорқаларидан унумли фойдаланиш, кичик саноат зоналарини ташкил этиш орқали тадбиркорликни ривожлантириш, пировардида ишсиз ва миграцияда юриб қийналган фуқароларимизни доимий ва даромадли иш билан таъминлаш масалаларини ҳам кўриб чиқди.

Бундан ташқари, туман ҳудудидаги йўлларда ҳаракат хавфсизлигини таъминлаш, йўл-транспорт ҳодисаларини олдини олиш мақсадида барпо этилаётган “Хавфсиз кўча” ва “Хавфсиз йўлак” лойиҳалари доирасида олиб борилаётган қурилиш ишлари ҳам кўздан кечирилди.

Яна бир муҳим жиҳат, аҳоли хонадонлари, маиший ва хизмат кўрсатиш шохобчалари, мулкчилик шаклидан қатъий назар корхона ва ташкилотларда хавфсизликни таъминлашга доир тарғибот тадбирларини олиб бориб, замонавий видеокузатув мосламаларини ўрнатиш, қўриқлаш пультига уланиш, шунингдек, энергия тежовчи замонавий технологияларнинг имкониятларидан оқилона фойдаланишнинг афзалликларини тушунтириш орқали қуёш панелларини ўрнатиш борасида манзилли ишларни олиб бориш бўйича ҳам кўрсатмалар берилди.

Туман ҳудудидан ўтувчи халқаро ва маҳаллий аҳамиятга эга йўлларда, ички кўчаларда тозалаш, ободонлаштириш, "Яшил макон" умуммиллий лойиҳаси доирасида манзарали ва мевали дарахт кўчатларини экиш, янги боғлар яратиш, фермер хўжаликларининг қишлоқ хўжалиги ерларида, боғ ва токзорларда баҳорги агротехник тадбирларни олиб бориш, ариқ ва зовурларни тозалаш, бетонлаштириш каби ишларни бажариш юзасидан берилган вазифаларнинг ижроси ҳам кўздан кечирилиб, қўшимча тавсия ва топшириқлар берилди.

Бу каби ўрганишлар давом эттирилмоқда.