Bugun viloyat 3-sektor rahbari Ikromjon Tursunov boshchiligidagi masʼullar, Davlatimiz rahbarining "2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yana-da oshirish chora-tadbirlari to‘g‘risida" gi 1-sonli Qarori ijrosi yuzasidan sektorga qarashli Vobkent tumanining “Xayrobod” mahallasida bo‘ldi.

Tumanning 3-sektoriga qarashli “Xayrobod” mahallasi mazkur qaror asosida tanlab olingan 4 ta og‘ir mahallalardan biri bo‘lib, bugungi kunda ushbu mahallani ijtimoiy-iqtisodiy rivojlantirish, kommunikatsiya tarmoqlari, infratuzilma holatini yaxshilash, aholini qiynab kelayotgan tizimli muammolarni hal etish, "Raqamlashgan, obod va xavfsiz mahalla" tamoyili asosida keng ko‘lamli tozalash-obodonlashtirish, qurilish-taʼmirlash, bunyodkorlik ishlari amalga oshirilmoqda.

Hududiy sektor rahbarlari va ushbu mahalla yettiligi ishtirokida o‘tkazilgan o‘rganishlar davomida Boshqarma boshlig‘i ko‘chama-ko‘cha, xonadonma-xonadon yurib, mahalla faollari va aholi bilan muloqot o‘tkazdi va jarayonda aholini qiynab kelayotgan mavjud ijtimoiy-maishiy muammolarni birma bir o‘rganib, ularni bartaraf etish borasida topshiriqlar berdi.

Prezidentimizning "Kambag‘allikdan farovonlik sari" Dasturi, shuningdek, "Sayxunobod", “Uychi”, “Zarbdor” va “G‘ijduvon” tumanlari tajribalari asosida aholining doimiy daromad manbaini oshirish, bir ko‘cha bir maxsulot tamoyili asosida mahalla drayverini yaratish, xonadonlarning tomorqalaridan unumli foydalanish, kichik sanoat zonalarini tashkil etish orqali tadbirkorlikni rivojlantirish, pirovardida ishsiz va migratsiyada yurib qiynalgan fuqarolarimizni doimiy va daromadli ish bilan taʼminlash masalalarini ham ko‘rib chiqdi.

Bundan tashqari, tuman hududidagi yo‘llarda harakat xavfsizligini taʼminlash, yo‘l-transport hodisalarini oldini olish maqsadida barpo etilayotgan “Xavfsiz ko‘cha” va “Xavfsiz yo‘lak” loyihalari doirasida olib borilayotgan qurilish ishlari ham ko‘zdan kechirildi.

Yana bir muhim jihat, aholi xonadonlari, maishiy va xizmat ko‘rsatish shoxobchalari, mulkchilik shaklidan qatʼiy nazar korxona va tashkilotlarda xavfsizlikni taʼminlashga doir targ‘ibot tadbirlarini olib borib, zamonaviy videokuzatuv moslamalarini o‘rnatish, qo‘riqlash pultiga ulanish, shuningdek, energiya tejovchi zamonaviy texnologiyalarning imkoniyatlaridan oqilona foydalanishning afzalliklarini tushuntirish orqali quyosh panellarini o‘rnatish borasida manzilli ishlarni olib borish bo‘yicha ham ko‘rsatmalar berildi.

Tuman hududidan o‘tuvchi xalqaro va mahalliy ahamiyatga ega yo‘llarda, ichki ko‘chalarda tozalash, obodonlashtirish, "Yashil makon" umummilliy loyihasi doirasida manzarali va mevali daraxt ko‘chatlarini ekish, yangi bog‘lar yaratish, fermer xo‘jaliklarining qishloq xo‘jaligi yerlarida, bog‘ va tokzorlarda bahorgi agrotexnik tadbirlarni olib borish, ariq va zovurlarni tozalash, betonlashtirish kabi ishlarni bajarish yuzasidan berilgan vazifalarning ijrosi ham ko‘zdan kechirilib, qo‘shimcha tavsiya va topshiriqlar berildi.

Bu kabi o‘rganishlar davom ettirilmoqda.