Ўзбекистон Республикаси Вазирлар Маҳкамасининг “Ички ишлар органларида жисмоний ва жанговар тайёргарликни ривожлантириш чора-тадбирлари тўғрисида” 2023-йил 23-августдаги 416-сон қарори ҳамда бошқарма бошлиғининг тегишли фармойишига асосан, вилоят ички ишлар органларида шахсий таркибнинг хизмат, жанговар, жисмоний ва психологик тайёргарлигини таъминлаш, ходимлар ва уларнинг оила аъзолари ўртасида соғлом турмуш тарзини кенг тарғиб этиш ва оммавий спортга бўлган қизиқишини ошириш мақсадида “Отам, онам ва мен спортчилар оиласи” шиори остида спорт мусобақаси бўлиб ўтди.

Мазкур мусобақа вилоят Ички ишлар бошқармаси негизидаги соҳавий хизматлар ҳамда шаҳар-туман Ички ишлар бўлимларининг ходимлари ҳамда уларнинг оила аъзоларидан таркиб топган 14 та жамоалар ўртасида ўтказилди.

Мусобақада иштирокчилар “Югуриш, акробатика элементлари ва тўпни нишонга отиш”, “Чаққонлик ва мерганлик” эстафетаси, “Моҳир ҳужумчи”, “Қаддимизни ростлаймиз, сакрашни бошлаймиз”, “Тезлик ва эпчиллик эстафетаси” каби шартларда ўзаро беллашишди.

 Дўстона муҳитда ўтган мусобақада фахрли 3-ўринни Шофиркон туманидан Норовлар оиласи, фахрли 2-ўринни Олот туманидан Ражабовлар оиласи ва фахрли 1-ўринни Бухоро туманидан Неговлар оиласи қўлга киритди.

Ғолиблар диплом, медаль ҳамда қимматбаҳо совғалар билан тақдирланди.

Бу каби спорт мусобақалари ходимлар ва уларнинг оила аъзолари ўртасида спортга бўлган қизиқишни янада орттириш, соғлом турмуш тарзини кенг тарғиб қилиш ва дўстона муҳитни яратишга замин яратади.