Давлатимиз раҳбарининг ташаббуси билан амалиётга жорий этилган аҳоли билан доимий мулоқот қилиш, фуқароларни қийнаётган муаммоларни ҳал этишнинг бундай самарали механизми ҳудудлар инфратузилмасини яхшилашга, аҳоли муаммоларини ҳал қилишга хизмат қилмоқда.

Хабарингиз бор, Бухоро вилояти 3-сектор раҳбари, Ички ишлар бошқармаси бошлиғи полковник Икромжон Турсунов ҳам айни шу мақсадда ҳудудларда бўлиб, жойларда амалга оширилаётган ислоҳотларнинг боришини кўздан кечириш, аҳолининг мавжуд муаммоларини ўрганиш, уларни тезкорлик билан бартараф этишга қаратилган юзма-юз мулоқотлар ўтказмоқда.

Бошқарма бошлиғи бошчилигида навбатдаги сайёр қабул Ғиждувон туманининг Бештуво маҳалласида ўтказилди.

Вилоят 3-сектор штаби аъзолари, туман сектор раҳбарлари ва бошқа масъуллар иштирокида ўтказилган сайёр қабулда 20 дан ортиқ турли масалалардаги мурожаатлар бирма-бир кўриб чиқилди.

Жумладан, ишга жойлаштириш, табиий газ қувурларининг эскирган қисмини алмаштириш, сунъий нотекисликлар ўрнатишда амалий ёрдам бериш, йўл инфратузилмасини яхшилаш, ички йўлларни шағаллаштириш, тадбиркорлик фаолиятини йўлга қўйиш учун имтиёзли кредит олишда амалий ёрдам беришга доир масалалар қабул қилинди.

Мурожаатларнинг жойида бартараф этилишига алоҳида эътибор қаратилиб, қўшимча ўрганиш ва қонуний қарор қабул қилиш учун муддат талаб қилганлари юзасидан аниқ ва манзилли чора-тадбирлар белгиланди.

Қабулдан сўнг бошқарма бошлиғи маҳалла "еттилик" вакилларининг ҳамкорликдаги иш фаолиятини ҳам ўрганди.

Ҳудудда муҳтарам президентимизнинг 1-сонли қарори асосида жиноят ва ҳуқуқбузарликларни олдини олиш, аҳолининг ижтимоий-иқтисодий муаммоларига ечим топиш, мурожаатлар билан ишлаш, аҳоли турмуш шароитини янада яхшилаш, янги иш ўринларини яратиш борасида маҳалла еттилик вакилларининг олдига қўйилган вазифалар, уларни ижро этишнинг механизмлари хусусида тушунтиришлар бериб, иш самарадорлигини оширишга доир ўзининг тавсия, кўрсатма ҳамда топшириқларини берди.

Албатта, бу каби сайёр қабулларни ўтказишдан кўзланган асосий мақсад халқ билан фаол ва очиқ мулоқот олиб бориш, аввало инсон ҳуқуқ ҳамда манфаатларини таъминлаш орқали халқимизнинг фаровон, бахтли ҳаёт кечириши учун муносиб шарт-шароитлар яратишдан иборатдир.

Бу каби тадбирлар тасдиқланган график асосида вилоятнинг барча ҳудудларида давом эттирилади.