21 Fevral 2025 yil 4159

Buxoro viloyati Ichki ishlar boshqarmasi boshlig‘i polkovnik Ikromjon Tursunov G‘ijduvon tumanining Beshtuvo mahallasida sayyor qabul o‘tkazdi

Davlatimiz rahbarining tashabbusi bilan amaliyotga joriy etilgan aholi bilan doimiy muloqot qilish, fuqarolarni qiynayotgan muammolarni hal etishning bunday samarali mexanizmi hududlar infratuzilmasini yaxshilashga, aholi muammolarini hal qilishga xizmat qilmoqda.

Xabaringiz bor, Buxoro viloyati 3-sektor rahbari, Ichki ishlar boshqarmasi boshlig‘i polkovnik Ikromjon Tursunov ham ayni shu maqsadda hududlarda bo‘lib, joylarda amalga oshirilayotgan islohotlarning borishini ko‘zdan kechirish, aholining mavjud muammolarini o‘rganish, ularni tezkorlik bilan bartaraf etishga qaratilgan yuzma-yuz muloqotlar o‘tkazmoqda.

Boshqarma boshlig‘i boshchiligida navbatdagi sayyor qabul G‘ijduvon tumanining Beshtuvo mahallasida o‘tkazildi.

Viloyat 3-sektor shtabi aʼzolari, tuman sektor rahbarlari va boshqa masʼullar ishtirokida o‘tkazilgan sayyor qabulda 20 dan ortiq turli masalalardagi murojaatlar birma-bir ko‘rib chiqildi.

Jumladan, ishga joylashtirish, tabiiy gaz quvurlarining eskirgan qismini almashtirish, sunʼiy notekisliklar o‘rnatishda amaliy yordam berish, yo‘l infratuzilmasini yaxshilash, ichki yo‘llarni shag‘allashtirish, tadbirkorlik faoliyatini yo‘lga qo‘yish uchun imtiyozli kredit olishda amaliy yordam berishga doir masalalar qabul qilindi.

Murojaatlarning joyida bartaraf etilishiga alohida eʼtibor qaratilib, qo‘shimcha o‘rganish va qonuniy qaror qabul qilish uchun muddat talab qilganlari yuzasidan aniq va manzilli chora-tadbirlar belgilandi.

Qabuldan so‘ng boshqarma boshlig‘i mahalla “yettilik” vakillarining hamkorlikdagi ish faoliyatini ham o‘rgandi.

Hududda muhtaram prezidentimizning 1-sonli qarori asosida jinoyat va huquqbuzarliklarni oldini olish, aholining ijtimoiy-iqtisodiy muammolariga yechim topish, murojaatlar bilan ishlash, aholi turmush sharoitini yana-da yaxshilash, yangi ish o‘rinlarini yaratish borasida mahalla yettilik vakillarining oldiga qo‘yilgan vazifalar, ularni ijro etishning mexanizmlari xususida tushuntirishlar berib, ish samaradorligini oshirishga doir o‘zining tavsiya, ko‘rsatma hamda topshiriqlarini berdi.

Albatta, bu kabi sayyor qabullarni o‘tkazishdan ko‘zlangan asosiy maqsad xalq bilan faol va ochiq muloqot olib borish, avvalo inson huquq hamda manfaatlarini taʼminlash orqali xalqimizning farovon, baxtli hayot kechirishi uchun munosib shart-sharoitlar yaratishdan iboratdir.

Bu kabi tadbirlar tasdiqlangan grafik asosida viloyatning barcha hududlarida davom ettiriladi.

Text to speech