Бухоро вилояти ИИБ бошлиғи полковник Миржамол Миралимов “Биринчи қўнғироқ” тадбирида иштирок этди
“Янги ҳаёт учун, Янги Ўзбекистон учун!” шиори остида ўтаётган давлатимиз мустақиллигининг 32 йиллиги шодиёналарига уланиб кетган "Билимлар куни" тадбирларида ички ишлар органлари ходимлари йўлларда ҳаракат хавфсизлиги, жамоат тартиби ҳамда фуқаролар хавфсизлигини таъминлаш билан бирга, мустақиллик дарсларида ҳам иштирок этиб, ёш авлодни ватанпарварлик руҳида тарбиялашга ўз ҳиссаларини қўшдилар.
Жумладан, Бухоро шаҳридаги 23-сонли умумий ўрта таълим мактабида ўтказилган тадбирда Бухоро вилояти Ички ишлар бошқармаси бошлиғи полковник Миржамол Миралимов иштирок этди.
Бошқарма бошлиғи ўқувчиларни янги ўқув йили бошланганлиги муносабати билан муборакбод этиб, мактабнинг биринчи синф ўқувчиларига Президент совғаларини топширди.
Шунингдек, вилоят 3 сектор раҳбари таълим масканида ўқувчи-ёшлар, педагогик жамоа учун яратилган шарт-шароитлар билан ҳам яқиндан танишди.
Вилоятнинг барча ҳудудларида ўтказилган бугунги "Билимлар куни" тадбирлари доирасидаги «Мустақиллик» дарсларида ҳудудий ички ишлар органлари раҳбарларининг барчаси иштирок этди.
