Ўзбекистон Республикаси Ички ишлар вазирининг 2025 йил 5 июль куни қабул қилинган тегишли фармойишига асосан, ички ишлар органлари ходимларининг касбий маҳоратини ошириш, жисмоний ва жанговар тайёргарлигини мустаҳкамлаш, махсус воситалар ва жанговар қуроллардан самарали ҳамда қонуний фойдаланиш кўникмаларини ривожлантириш мақсадида Ички ишлар вазирлиги томонидан мамлакат бўйлаб сайёр ўқув йиғинлари ташкил этилмоқда.

Мазкур фармойиш ижросини таъминлаш доирасида Бухоро вилоятида Ички ишлар вазирлиги ишчи гуруҳи раҳбарлигида амалий машғулотлар ва ўқув семинарлари фаол олиб борилмоқда. Айниқса, Шофиркон тумани ички ишлар бўлимида хизмат қилаётган ходимлар билан ўтказилган машғулотларда ходимларнинг профессионал тайёргарлиги ва ҳаракатчанлиги юзасидан аниқ баҳолаш ишлари амалга оширилди.

Ўқув жараёнида:

-ходимлар билан жанговар тайёргарлик, жисмоний машқлар ва командалик ҳаракатлари бўйича амалий машғулотлар ўтказилди;

-махсус воситалар, хусусан, электрошокерлардан хавфсиз ва мақсадли фойдаланиш услублари намойиш этилди;

-жанговар ўқотар қуролларни тўғри қўллаш, улардан фойдаланишдаги ҳуқуқий ва техник талаблар кенг муҳокама қилинди;

-экстремал вазиятларда тўғри қарор қабул қилиш кўникмалари ишлаб чиқилди.

Ушбу ўқув йиғинлари ходимларнинг амалиётга яқин шароитда тажриба тўплашларига, шунингдек, хизмат фаолиятида учраши мумкин бўлган турли хавфли вазиятларда самарали ҳаракат қилиш салоҳиятини оширишга қаратилган.

Ҳозирда ишчи гуруҳ Бухоро вилоятининг бошқа туманларида ҳам шундай ўқув машғулотларини босқичма-босқич давом эттирмоқда. Ташкил этилаётган машғулотлар орқали ички ишлар органлари ходимларининг умумий тайёргарлиги янада мустаҳкамланиши ва фуқаролар хавфсизлигини таъминлашдаги самарадорлиги ошиши кутилмоқда.