O‘zbekiston Respublikasi Ichki ishlar vazirining 2025 yil 5 iyul kuni qabul qilingan tegishli farmoyishiga asosan, ichki ishlar organlari xodimlarining kasbiy mahoratini oshirish, jismoniy va jangovar tayyorgarligini mustahkamlash, maxsus vositalar va jangovar qurollardan samarali hamda qonuniy foydalanish ko‘nikmalarini rivojlantirish maqsadida Ichki ishlar vazirligi tomonidan mamlakat bo‘ylab sayyor o‘quv yig‘inlari tashkil etilmoqda.

Mazkur farmoyish ijrosini taʼminlash doirasida Buxoro viloyatida Ichki ishlar vazirligi ishchi guruhi rahbarligida amaliy mashg‘ulotlar va o‘quv seminarlari faol olib borilmoqda. Ayniqsa, Shofirkon tumani ichki ishlar bo‘limida xizmat qilayotgan xodimlar bilan o‘tkazilgan mashg‘ulotlarda xodimlarning professional tayyorgarligi va harakatchanligi yuzasidan aniq baholash ishlari amalga oshirildi.

O‘quv jarayonida:

-xodimlar bilan jangovar tayyorgarlik, jismoniy mashqlar va komandalik harakatlari bo‘yicha amaliy mashg‘ulotlar o‘tkazildi;

-maxsus vositalar, xususan, elektroshokerlardan xavfsiz va maqsadli foydalanish uslublari namoyish etildi;

-jangovar o‘qotar qurollarni to‘g‘ri qo‘llash, ulardan foydalanishdagi huquqiy va texnik talablar keng muhokama qilindi;

-ekstremal vaziyatlarda to‘g‘ri qaror qabul qilish ko‘nikmalari ishlab chiqildi.

Ushbu o‘quv yig‘inlari xodimlarning amaliyotga yaqin sharoitda tajriba to‘plashlariga, shuningdek, xizmat faoliyatida uchrashi mumkin bo‘lgan turli xavfli vaziyatlarda samarali harakat qilish salohiyatini oshirishga qaratilgan.

Hozirda ishchi guruh Buxoro viloyatining boshqa tumanlarida ham shunday o‘quv mashg‘ulotlarini bosqichma-bosqich davom ettirmoqda. Tashkil etilayotgan mashg‘ulotlar orqali ichki ishlar organlari xodimlarining umumiy tayyorgarligi yana-da mustahkamlanishi va fuqarolar xavfsizligini taʼminlashdagi samaradorligi oshishi kutilmoqda.