Ўзбекистон Республикаси Президенти Шавкат Мирзиёев муборак Рамазон ҳайитини нишонлаш арафасида халқимизга хос эзгулик, бағрикенглик, инсонпарварлик, меҳр-оқибат ва кечиримли бўлиш каби олижаноб фазилатларнинг ёрқин ифодаси сифатида “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Фармонни имзолади.

Фармонга мувофиқ, Ўзбекистон Республикаси Конституциясининг 109-моддаси 23-бандига асосан жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 488 нафар шахс афв этилди. Улар қаторида Шофиркон туманида истиқомат қилувчи 4 нафар шахслар ҳам бор.

Ички ишлар вазирлиги масъуллари ҳамда Бухоро вилояти Ички ишлар бошқармаси раҳбарияти бошчилигидаги ишчи гуруҳ вакиллари ушбу фуқароларнинг хонадонларида бўлиб, уларнинг оилавий шароитларини, мавжуд муаммоларини ўрганишди.

Жараёнда давлатимиз раҳбари томонидан берилган имкониятлардан оқилона фойдаланиш борасида тушунчалар берилди.

Шунингдек, афв этилиб, оиласи ва яқинлари бағрига қайтган ушбу фуқароларни ижтимоий ҳаётга мослаштириш, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун кўмак бериш борасида маҳалла "еттилиги", тегишли корхона ва ташкилотлар вакилларига топшириқ ва кўрсатмалар берилди.