O‘zbekiston Respublikasi Prezidenti Shavkat Mirziyoyev muborak Ramazon hayitini nishonlash arafasida xalqimizga xos ezgulik, bag‘rikenglik, insonparvarlik, mehr-oqibat va kechirimli bo‘lish kabi olijanob fazilatlarning yorqin ifodasi sifatida “Jazo muddatini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga qatʼiy o‘tgan bir guruh shaxslarni afv etish to‘g‘risida”gi Farmonni imzoladi.

Farmonga muvofiq, O‘zbekiston Respublikasi Konstitutsiyasining 109-moddasi 23-bandiga asosan jazo muddatini o‘tayotgan hamda qilmishiga chin ko‘ngildan pushaymon bo‘lgan va tuzalish yo‘liga qatʼiy o‘tgan 488 nafar shaxs afv etildi. Ular qatorida Shofirkon tumanida istiqomat qiluvchi 4 nafar shaxslar ham bor.

Ichki ishlar vazirligi masʼullari hamda Buxoro viloyati Ichki ishlar boshqarmasi rahbariyati boshchiligidagi ishchi guruh vakillari ushbu fuqarolarning xonadonlarida bo‘lib, ularning oilaviy sharoitlarini, mavjud muammolarini o‘rganishdi.

Jarayonda davlatimiz rahbari tomonidan berilgan imkoniyatlardan oqilona foydalanish borasida tushunchalar berildi.

Shuningdek, afv etilib, oilasi va yaqinlari bag‘riga qaytgan ushbu fuqarolarni ijtimoiy hayotga moslashtirish, foydali mehnat bilan shug‘ullanishlari, sog‘lom turmush tarzini yo‘lga qo‘yib, jamiyatda munosib o‘rin topishlari uchun ko‘mak berish borasida mahalla “yettiligi”, tegishli korxona va tashkilotlar vakillariga topshiriq va ko‘rsatmalar berildi.