Ўзбекистон Республикаси Президенти Администрацияси томонидан хонадонбай юриб аҳоли муаммоларини ўрганиш, куз-қиш мавсумида юзага келиши мумкин бўлган салбий ҳолатларнинг олдини олиш, коммунал соҳаларда аниқланадиган муаммоларни тезкорлик билан бартараф этиш бўйича берилган топшириқлар ижросини таъминлаш юзасидан Шофиркон тумани ИИБ да ташкил этилган тезкор штаб ходимлари билан йўриқнома ўтказилиб, амалга оширилиши лозим бўлган чора-тадбирлар белгилаб олинди.

Ҳудудий ички ишлар, газ, электр ва ичимлик сув таъминоти идоралари диспетчерлик хизматига фуқаролар томонидан тушаётган мурожаатларни кўриб чиқилиш ҳамда рўйхатга олиниш жараёни алоҳида назоратга олиниб, зудлик билан ҳал этиш чоралари кўрилмоқда.

Шунингдек, ҳудудларда мавжуд ижтимоий соҳа объектлари, хонадонлар кўздан кечирилиб, фуқароларнинг муаммолари тингланди ҳамда профилактик тушунтириш ишлари олиб борилмоқда.

Ўрганиш жараёнида ижтимоий ёрдамга муҳтож бўлган фуқароларга озиқ-овқат маҳсулотлари тарқатилди.

Бундан ташқари илгари судланган, Пробация ҳисобида турган ҳамда профилактик ҳисобда турган фуқаролар билан ҳам профилактик суҳбатлар олиб борилиб, ушбу тоифадаги шахслар томонидан қайта жиноят ва ҳуқуқбузарликлар содир этмасликлари бўйича огоҳлантириш ва тушунтириш ишлари олиб борилди.

Туман ИИБ ходимлари билан мутасадди ташкилот вакиллари ҳамкорлигида хонадонлар кўздан кечирилиб, ноқонуний ўрнатилган газ сўрғичлар аниқланиб, маъмурий чоралар кўриш учун тегишли ҳужжатлар расмийлаштирилди.

Шундан сўнг, Шофиркон тумани ИИБ бошлиғи, 3-сектор раҳбари A.Q.Ismoilov ҳамда туман сектор раҳбарлари томонидан туманнинг 3-секторида жойлашган оилавий шифокорлик поликлиникаларининг қиш мавсумига тайёргарлик даражаси кўздан кечирилиб, энергия ресурсларидан самарали ва оқилона фойдаланиш ҳолатларига эътибор қаратилди.

«Денов» маҳалласида жойлашган 49-сон ОШП да бўлган туман масъуллари бинодаги мавжуд хоналарни кўздан кечиб, хоналарнинг иссиқлик ҳолати, санитария талабларига жавоб беришини ўрганишди.

Аниқланган муаммо ва камчиликларни зудлик билан бартараф этиш юзасидан масъулларга топшириқлар берилиб, ижроси назоратга олинди.

Ишчи гуруҳнинг навбатдаги манзили “Неккиши" маҳалласида жойлашган оилавий шифокорлик пункти бўлди. Ушбу ОШП нинг иситиш тизими кўмирга мослаштирилганлиги сабабли туман 3-сектор раҳбари томонидан қўшимча кўмир захираси билан таъминланди.

Масъуллар туманнинг «Дўрмон» маҳалласида жойлашган янгидан қурилган ОШП га ҳам ташриф буюриб, бу ерда яратилган шарт-шароитлар билан яқиндан танишишди.

Бу каби ўрганиш ишлари, вилоятнинг 3-секторига қарашли Ғиждувон ва Вобкент туманлари, шунингдек, барча шаҳар ва туманларнинг 3-секторига қарашли ҳудудларида давом эттирилмоқда.