Bugungi kunda Buxoro viloyatining 3-sektoriga qarashli hududlarda ham aholining ijtimoiy iqtisodiy muammolariga yechim topish, hududlarni obodonlashtirish, mahallalar infratuzilmasini yaxshilash, zamonaviy tipdagi ijtimoiy obyektlarni qurish ishlari jadallik bilan olib borilmoqda.

Bugun, G‘ijduvon tumanida bo‘lgan viloyat 3-sektor rahbari Ikromjon Tursunov tumanda bu borada amalga oshirilayotgan ishlar surʼati bilan tanishdi.

G‘ijduvon viloyatimizning iqtisodi rivojlangan tumanlaridan biri bo‘lib, ushbu tumanga qo‘shni viloyat hamda tumanlardan ko‘plab fuqarolar savdo-sotiq ishlari bilan tashrif buyurishadi.

Shu sababli tumanda faoliyat olib borayotgan savdo markazlari hamda bozorlar doimo gavjum.

Buningi kunda tuman dehqon bozori oldida avtomashinalar tirbandligini hamda yo‘l transport hodisalarini oldini olish, fuqarolarga qo‘shimcha qulayliklar yaratish maqsadida zamonaviy yer osti yo‘lagi barpo etilmoqda.

Ushbu obyektda olib borilayotgan qurilish taʼmirlash ishlarini ko‘zdan kechirgan boshqarma boshlig‘i tuman mutasaddilari hamda pudratchi tashkilot vakillari bilan qurilish ishlarida mavjud muammolarni o‘rgandi va jarayonda qurilish ishlarining reja grafigiga amal qilinishi, sifatga alohida eʼtibor qaratish lozimligi yuzasidan o‘zining bir qator tavsiyalarini berdi.

Shundan so‘ng tuman Madaniyat Markazi binosining qurilish jarayonini ham ko‘zdan kechirdi. Bu yerda ham viloyat 3-sektor rahbari ushbu inshootni ham zamon standartlari asosida, yuqori sifat darajasida tez fursatlarda foydalanishga topshirish yuzasidan topshiriqlar berdi.

Shuningdek, boshqarma boshlig‘i G‘ijduvon tumanining Yangi O‘zbekiston massivida "Yashil makon" umummilliy loyihasi doirasida barpo etilishi rejalashtirilayotgan yangi bog‘ uchun tanlangan yer maydonini tayyorlash borasidagi ishlarni ham borib o‘rganib, bog‘ hududiga iqlim sharoitidan kelib chiqib, mevali hamda manzarali daraxt ko‘chatlarini o‘tqazish, bog‘ni sug‘orish bilan bog‘liq masalalar yuzasidan o‘zining tegishli tavsiya hamda ko‘rsatmalarini berdi.