O‘zbekiston Respublikasi Prezidentining 2021-yil 15-aprel kunidagi “Ichki ishlar organlari uchun professional kadrlarni tayyorlashning sifat jihatidan yangi tizimini joriy etish bo‘yicha chora-tadbirlar to‘g‘risida”gi 5076-sonli, “Ichki ishlar organlarini xalqchil professional tuzilmaga aylantirish va aholi bilan yana-da yaqin hamkorlikda ishlashga yo‘naltirish bo‘yicha qo‘shimcha chora-tadbirlar to‘g‘risida” 2023-yil 20-yanvardagi 10-sonli Qarorlari hamda viloyat ichki ishlar boshqarmasi maʼnaviy – maʼrifiy ishlar va kadrlar bilan ishlash xizmati, jamoat xavfsizligi xizmati Huquqbuzarliklar profilaktikasi boshqarmasining 2025-yilga mo‘ljallangan amalga oshirilishi lozim bo‘lgan chora-tadbirlar Yo‘l xaritasining tegishli bandlari ijrosini taʼminlash maqsadida viloyat ichki ishlar organlarida faoliyat olib borayotgan huquqbuzarliklar profilaktikasi xodimlarining huquqiy va kasbiy bilimlarini oshirishga qaratilgan sayyor o‘quv mashg‘ulotlari o‘tkazilmoqda.

Qisqa muddatli o‘quv kurslarini samarali tashkil etish maqsadida viloyat huquq-tartibot idoralari, oliy taʼlim muassasalari professor-o‘qituvchilari hamda viloyat ichki ishlar boshqarmasining tegishli sohaviy xizmatlarining malakali xodimlari jalb etilgan.

Kuni kecha Olot tumani Ichki ishlar bo‘limi xodimlari ishtirokida boshlangan o‘quv seminarlarida dastlab xodimlarga sohaga oid Qonun, Prezident qaror va Farmonlari, Ichki ishlar vazirligining buyruqlari mazmun mohiyati tushuntirildi.

Shuningdek, Ichki ishlar organlarida jinoyat va hodisalarga oid arizalar, xabarlar hamda boshqa maʼlumotlarni ko‘rib chiqishning huquqiy asoslari va tartibi, “Huquqbuzarliklar profilaktikasi to‘g‘risida”gi qonun, Huquqbuzarliklar profilaktikasining turlari, chora-tadbirlari hamda ularni qo‘llash asoslari, profilaktika inspektorlari tomonidan jinoyat haqidagi ariza va xabarlar yuzasidan olib borilayotgan tergovga qadar tekshiruv harakatlari davomida yo‘l qo‘yilayotgan xato va kamchiliklar, hodisa sodir bo‘lgan joyni ko‘zdan kechirishda profilaktika inspektorlarining harakatlari xususida batafsil tushunchalar berilmoqda.

Shu bilan birga, O‘zbekiston Respublikasi qonun va qonun osti hujjatlariga kiritilgan oxirgi o‘zgartirish va qo‘shimchalarning mazmuni va mohiyati, “E-maʼmuriy ish” elektron tizimida maʼmuriy bayonnoma va maʼmuriy qarorlarni rasmiylashtirish, tazyiq va zo‘ravonlikka uchragan xotin-qizlarga nisbatan himoya orderi rasmiylashtirish tartib qoidalari, spirtli ichimlikka ruju qo‘ygan shaxslarni majburiy davolanishga yuborish, ruhiy kasallarni shifoxonaga joylashtirish va muayyan yashash joyiga ega bo‘lmagan shaxslarni reabilitatsiya qilish, probatsiya nazoratida turgan shaxslar bilan ishlash, ov quroliga ega bo‘lgan shaxslar tomonidan qurollarni saqlash tartibiga rioya etilishini tekshirishning o‘ziga xos xususiyatlari mavzularida maʼruzalar qilinmoqda.

O‘quv seminarida ochiqlik sharoitida xizmatni qanday olib borish, ichki ishlar organlari va jamoatchilik nazorati subyektlarining o‘zaro hamkorligi qanday bo‘lishi kerakligi, axborot tarqatish jarayonida qanday huquq va majburiyatlar mavjudligi, nopok jamoatchilik vakillaridan qanday himoyalanish zarurligi xususida ham atroflicha tushuntirishlar berilib, bu borada tayyorlangan videorolik xodimlar eʼtiboriga yetkazilmoqda.

Maʼlumot o‘rnida, profilaktika inspektorlarining huquqiy va kasbiy tayyorgarligini oshirishga qaratilgan o‘quv-amaliy kurslari yakuni bo‘yicha test imtihonlari qabul qilib, xodimlarning egallagan bilim va ko‘nikmalari sinovdan o‘tkaziladi.

Buxoro viloyati ichki ishlar organlarida faoliyat olib borayotgan profilaktika inspektorlarining huquqiy va kasbiy bilim ko‘nikmalarini oshirishga qaratilgan o‘quv seminar mashg‘ulotlari tasdiqlangan reja grafik asosida davom etmoqda.