Rasmiy sahifalarimizni kuzatib borayotgan bo‘lsangiz, Ichki ishlar boshqarmasi boshlig‘i Ikromjon Tursunov aholi bilan doimiy muloqot qilib, fuqarolarni qiynayotgan muammolarni hal etish, mamlakatimizda amalga oshirilayotgan islohotlarni aholiga yetkazish borasida bevosita joylarga chiqib, aholi bilan yuzma-yuz muloqotlar o‘tkazib kelmoqda.

Bugun ham boshqarma boshlig‘i Romitan tumanining Guliston mahallasida aholi murojaatlarini tingladi.

Viloyat 3-sektor shtabi aʼzolari, tuman sektor rahbarlari, Xalq qabulxonasi, tegishli tashkilot va idoralar masʼullari ishtirokida o‘tkazilgan yuzma-yuz ochiq muloqotda 10 dan ortiq fuqarolarning 15 ga yaqin turli masalalardagi murojaatlari birma bir ko‘rib chiqildi.

Jarayonda asosan tadbirkorlik faoliyati bilan shug‘ullanishi uchun amaliy yordam, ichki yo‘llarni taʼmirlash, eskirgan elektr simyog‘ochlarni taʼmirlash, yaroqsiz holatga kelib qolganlarini yangilash, davolanish va dori-darmon olishda ko‘mak ko‘rsatish kabi masalalar ko‘tarildi.

Murojaatlarning aksariyati shu kunning o‘zida yechim topgan bo‘lsa, qo‘shimcha o‘rganish va qonuniy qaror qabul qilish uchun yurituvga olingan murojaatlar yuzasidan aniq va manzilli chora-tadbirlar belgilanib, masʼullarga ko‘rsatma va topshiriqlar berildi.

Boshqarma boshlig‘i mahalla masʼullari bilan suhbatda, aholi bilan muloqotda bildirilgan takliflar, ko‘tarilgan muammolar asosida hududni ijtimoiy-iqtisodiy rivojlantirish va aholi turmush sharoitini yana-da yaxshilash, mahallalarda yangi ish o‘rinlarini yaratish, asosan “Temir”, “Yoshlar” va “Ayollar” daftarlariga kirgan, ishsiz fuqarolarni doimiy ish bilan taʼminlash masalalariga alohida eʼtibor qaratish lozimligini taʼkidladi.

Shuningdek, O‘zbekiston Respublikasi Prezidentining 2025-yil 3-yanvar kunidagi "2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yana-da oshirish chora-tadbirlari to‘g‘risida" gi 1-sonli Qaroridan kelib chiqib, ishlab chiqilgan "Yo‘l xaritasi" bandlari ijrosini taʼminlash, mahallani jinoyatdan holi hududga aylantirish borasida masʼullar va mahalla “yettilik” vakillarining zimmasidagi vazifalar yuzasidan o‘zining tegishli tavsiya hamda ko‘rsatmalarini berdi.

Bu kabi sayyor qabullar viloyatimizning 3-sektoriga qarashli G‘ijduvon, Shofirkon va Vobkent tumanlarining barcha hududlarida, bundan tashqari, qolgan shahar va tumanlarning 3-sektorlariga qarashli mahallalarida tasdiqlangan grafik asosida o‘tkazib boriladi.