Boshqarma boshlig‘i tuman sektor rahbarlari bilan bo‘lgan suhbatda tumanni ijtimoiy-iqtisodiy rivojlantirish, kommunikatsiya tarmoqlari, infratuzilma holatini yaxshilash, aholini qiynab kelayotgan tizimli muammolarni hal etish, "Obod va xavfsiz xonadon" tamoyili asosida mahallalarda amalga oshirilayotgan keng ko‘lamli tozalash-obodonlashtirish, qurilish-taʼmirlash, bunyodkorlik ishlarini yana-da jadallashtirishga doir ko‘rsatmalar berdi.

Shuningdek, Davlatimiz rahbarining 2024 yil 23 sentyabr kunidagi “Kambag‘allikdan farovonlik sari” dasturi doirasida "Sayxunobod", “Uychi”, “Zarbdor” va “G‘ijduvon” tumanlari tajribalari asosida aholining kam taʼminlangan qismining daromadini oshirish, mahallalar drayverini yaratish, tadbirkorlik istagida bo‘lgan fuqarolar ro‘yxatlarini shakllantirish hamda ularni kichik biznes va tadbirkorlikka yo‘naltirish, hududlarda kichik sanoat zonalarini tashkil etish, pirovardida esa ishsiz va migratsiyada yurib qiynalgan fuqarolarimizni doimiy va daromadli ish bilan taʼminlagan holda turli yod g‘oyalardan asrash, huquqbuzarlik va jinoyatchilikka barham berish borasida ham masʼullarga o‘zining tavsiya va topshiriqlarini berdi.

Jarayonda aholi xonadonlari, maishiy va xizmat ko‘rsatish shoxobchalari, mulkchilik shaklidan qatʼiy nazar korxona va tashkilotlarda xavfsizlikni taʼminlashga doir targ‘ibot tadbirlarini olib borib, zamonaviy videokuzatuv moslamalarini o‘rnatish, qo‘riqlash pultiga ulanish, shuningdek, energiya tejovchi zamonaviy texnologiyalarning imkoniyatlaridan oqilona foydalanishning afzalliklarini tushuntirish orqali quyosh panellarini o‘rnatish borasida manzilli ishlar olib borish bo‘yicha ham ko‘rsatmalar berildi.

Shu bilan birga, tuman hududidan o‘tuvchi xalqaro va mahalliy ahamiyatga ega bo‘lgan yo‘llarda, ichki ko‘chalarda tozalash, obodonlashtirish, "Yashil makon" umummilliy loyihasi doirasida manzarali va mevali daraxt ko‘chatlarini ekish, yangi bog‘lar yaratish, qishloq xo‘jaligi yerlarida, bog‘ va tokzorlarda agrotexnik tadbirlarni olib borish, ariq va zovurlarni tozalash, betonlashtirish kabi ishlarni bajarish yuzasidan vazifalar belgilab berildi.