Bugun, viloyat 3-sektor rahbari, Ichki ishlar boshqarmasi boshlig‘i polkovnik Ikromjon Tursunov Davlatimiz rahbarining "2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yana-da oshirish chora-tadbirlari to‘g‘risida" gi 1-sonli Qarori asosida tuman hamda mahalla kesimida ishlab chiqilgan yo‘l xaritalarining ijrosini taʼminlash maqsadida 3-sektorga qarashli Shofirkon tumanida o‘rganishlar olib bordi.

Boshqarma boshlig‘i Shofirkon tumani sektor rahbarlari va boshqa masʼullar bilan birgalikda tumanni ijtimoiy-iqtisodiy rivojlantirish, kommunikatsiya tarmoqlari, infratuzilma holatini yaxshilash, aholini qiynab kelayotgan tizimli muammolarni hal etish, "Obod va xavfsiz xonadon" tamoyili asosida mahallalarda amalga oshirilayotgan keng ko‘lamli tozalash-obodonlashtirish, qurilish-taʼmirlash ishlarini joyiga borib ko‘zdan kechirdi.

Jumladan, "Xo‘jaorif" mahallasida qurilayotgan Bolalar oromgohining qurilish jarayoni bilan tanishib o‘zining tegishli tavsiyalarini berdi.

“Sultonobod” hamda "Shibirg‘on" mahallalari yettilik vakillari bilan xonadonma-xonadon, ko‘chama-ko‘cha yurib, davlatimiz rahbarining “Kambag‘allikdan farovonlik sari” dasturi, "Sayxunobod", “Uychi”, “Zarbdor” va “G‘ijduvon” tumanlari tajribalari asosida mahallalarda tomorqadan unumli foydalanish, tadbirkorlikni rivojlantirish bo‘yicha olib borilayotgan amaliy ishlar bilan tanishib, masʼullarning hisobotlarini tingladi.

Jarayonda, aholining kam taʼminlangan, ishsiz va migratsiyada yurib qiynalgan qatlamini doimiy ish bilan taʼminlash, tadbirkorligini kengaytirmoqchi bo‘lgan fuqarolarga yaratib berilayotgan imkoniyatlar xususida ham batafsil tushunchalar berdi.

Aholi murojaatlari bilan ishlash, mahallalarda mavjud ijtimoiy va maishiy muammolarni o‘z vaqtida hal etish yuzasidan topshiriqlar berdi.

Shundan so‘ng, tuman Markaziy dehqon bozori oldida qurilayotgan yangi “Avtobekat” loyihasi bilan tanishib, qurilish jarayonlarini jadallashtirish yuzasidan masʼullarga zaruriy ko‘rsatmalar berdi.

"Raqamlashgan, obod va xavfsiz mahalla" tamoyili asosida aholi xonadonlari ko‘cha va jamoat joylarida, maishiy va xizmat ko‘rsatish shoxobchalari, mulkchilik shaklidan qatʼiy nazar korxona va tashkilotlarda zamonaviy videokuzatuv moslamalarini o‘rnatish, qo‘riqlash pultiga ulash, shuningdek, energiya tejovchi zamonaviy texnologiyalarning imkoniyatlaridan oqilona foydalanishning afzalliklarini tushuntirish orqali quyosh panellarini o‘rnatish yuzasidan targ‘ibot tadbirlarini kuchaytirish borasida ham ko‘rsatmalar berildi.

"Yashil makon" umummilliy loyihasi doirasida manzarali va mevali daraxt ko‘chatlarini ekish, yangi bog‘lar yaratish, qishloq xo‘jaligi yerlarida, bog‘ va tokzorlarda agrotexnik tadbirlarni olib borish, ariq va zovurlarni tozalash, betonlashtirish kabi ishlarni bajarish yuzasidan berilgan vazifalarning ijrosi ham ko‘zdan kechirildi.

Bu kabi o‘rganishlar kunlik reja asosida davom ettirilmoqda.