Xodimlarning bilim saviyasi va kasb mahoratini oshirish maqsadida tashkil etilgan seminarda boshqarma boshlig‘ining o‘rinbosarlari, tegishli sohaviy xizmatlar rahbarlari, hududiy ichki ishlar organlari rahbarlari hamda ularning o‘rinbosarlari ishtirok etishdi.

Bunda dastlab, boshqarma boshlig‘i o‘rinbosari polkovnik Oqil Hasanov maʼruza qilib, bu turdagi jinoyatlarni oldini olish borasidagi targ‘ibot tadbirlarining sustligi, yetarli tashviqot olib borilmayotganligini alohida taʼkidlab, ushbu sohada sodir etilayotgan jinoyatlarni fosh etish va tergov ishlarini yuritishda yuzaga kelayotgan muammolar, yo‘l qo‘yilayotgan kamchiliklar yuzasidan so‘z yuritdi.

Shuningdek, xodimlarga jinoyat ishlari yuzasidan haqiqatni va ishni to‘g‘ri hal qilish uchun ahamiyatga ega bo‘lgan boshqa holatlarni aniqlash, qonuniy, asoslantirilgan va adolatli qaror qabul qilish borasidagi masʼuliyatini oshirish yuzasidan topshiriqlar berildi.  

Buxoro viloyati Ichki ishlar boshqarmasining ushbu yo‘nalishda faoliyat olib boruvchi xodimlari tomonidan mavzu doirasida maʼruzalar qilindi.

Jumladan, zamonaviy kiberxavflarga qarshi kurashish, bu sohada sodir etilayotgan jinoyatlarning turlari va ularni fosh etish uslublari, kiberxavfsizlik sohasidagi zamonaviy tahdidlar, ayniqsa internet tarmoqlari yordamida sodir etilgan firibgarlik, shaxsiy maʼlumotlarni o‘g‘irlash, moliyaviy resurslarni talon-toroj qilish kabi jinoyatlar haqida batafsil maʼlumot berdilar.

Shuningdek, ushbu turdagi jinoyatlarni fosh etishda zamonaviy axborot tizimlari va texnologiyalardan samarali foydalanish masalalari muhokama qilindi.

Kiberxavfsizlik bo‘yicha xalqaro tajriba va zamonaviy usullar haqidagi maʼlumotlarni yetkazish bilan birga, ishtirokchilarga turli vaziyatlar bo‘yicha amaliy mashg‘ulotlar ham o‘tkazildi.

Xususan, shaxsiy maʼlumotlar himoyasini taʼminlash, firibgarliklardan himoya qilish, kiberxavflar kelib chiqish sabablarini tahlil qilish hamda jinoyatchilarni aniqlash bo‘yicha treninglar o‘tkazildi.

Mashg‘ulot yakunida masʼul rahbar va xodimlarga maxsus tavsiyalar berilib, kiberxavflarga qarshi kurashda turli dasturiy taʼminotlardan foydalanish bo‘yicha amaliy maslahatlar taqdim etildi.

Bunday mashg‘ulotlar ichki ishlar organlari xodimlarining malakasini yana-da oshirishga, shu orqali kiberxavflarga qarshi samarali kurashish imkoniyatlarini yaratishga xizmat qiladi.