Davlatimiz rahbarining tashabbusi bilan amaliyotga joriy etilgan aholi bilan doimiy muloqot qilish, fuqarolarni qiynayotgan muammolarni hal etishning bunday samarali mexanizmi hududlar infratuzilmasini yaxshilashga, aholi muammolarini hal qilishga xizmat qilmoqda.

O‘zbekiston Respublikasi Prezidentining 2019-yil 17-yanvardagi "Aholi muammolari bilan ishlash tizimini yanada takomillashtirish chora-tadbirlari to‘g‘risida"gi Farmoni hamda Ichki ishlar vazirining 2024-yil 24-apreldagi "Ichki ishlar organlarida jismoniy va yuridik shaxslarning murojaatlari bilan ishlashni takomillashtirish to‘g‘risida"gi buyrug‘i talablarini taʼminlash maqsadida o‘tkazilgan qabulda viloyat 3-sektor shtabi aʼzolari, Kogon tuman Ichki ishlar bo‘limi hamda tuman hokimligi masʼullari va murojaatiga yechim izlab kelgan fuqarolar ishtirok etishdi.

Jarayonda 40 ga yaqin fuqarolarning 20 dan ortiq turli masalalardagi murojaatlari birma-bir ko‘rib chiqildi.

Jumladan, yo‘l infratuzilmasini yaxshilash, ko‘chalarni shag‘allashtirish, oilaviy kelishmovchilik, uy-joy va nizoli yer masalasidagi o‘za kelishmovchilikni qonuniy hal qilib berish borasidagi masalalar yo‘llandi.

Murojaatlarning joyida bartaraf etilishiga alohida eʼtibor qaratilib, qo‘shimcha o‘rganish va qonuniy qaror qabul qilish uchun muddat talab qilganlari yuzasidan aniq va manzilli chora-tadbirlar belgilandi.

Albatta, bu kabi sayyor qabullarni o‘tkazishdan ko‘zlangan asosiy maqsad xalq bilan faol va ochiq muloqot olib borish, avvalo inson huquq hamda manfaatlarini taʼminlash orqali xalqimizning farovon, baxtli hayot kechirishi uchun munosib shart-sharoitlar yaratishdan iboratdir.