Buxoro viloyati hokimi boshchiligidagi mutasaddilar Buxoro shahrining kriminogen vaziyati og‘ir, qizil toifali «S.Ayniy» mahalla fuqarolar yig‘inida bo‘lib, aholini qiynayotgan muammolarni o‘rganib, mahallalarda ishsizlik va kambag‘allikni qisqartirish, jinoyat va huquqbuzarliklarni oldini olish, aholi farovonligini oshirish, sanoatlashgan ushbu hududning investitsiya va eksport salohiyatini yuksaltirish, aholi kayfiyatiga salbiy taʼsir ko‘rsatuvchi muammolarni hal qilish, migratsiyada yurgan yoki qaytib kelgan fuqarolar bilan manzilli ishlash, bunda “mahalla yettiligi” ning hamkorligini taʼminlashga qaratilgan masalalar yuzasidan ochiq muloqot o‘tkazildi.

Shuningdek, masʼullar boshchiligida mahalladagi ishsiz fuqarolar bilan yuzma-yuz suhbat o‘tkazildi. Ularning qiziqishi va mavjud imkoniyatdan kelib chiqib, ish o‘rinlari taklif qilindi. Shunga ko‘ra, aksariyat fuqarolarni shu joyning o‘zida ishga joylashishiga erishildi.

O‘z navbatida mahallada aholi kayfiyatiga salbiy taʼsir ko‘rsatuvchi muammolarni hal qilish, hududda kriminogen vaziyatni barqarorlashtirish, aholining huquqiy savodxonligini oshirish, migratsiyadagilar bilan manzilli ishlash, investitsiya va eksport yo‘nalishidagi ishlarni tizimli tashkil etish borasida amalga oshirilishi lozim bo‘lgan ishlar yuzasidan aniq chora-tadbirlar ishlab chiqildi.

Mazkur mahalla misolida boshqa hududlarda ham belgilangan yo‘nalishlarda kechiktirib bo‘lmas vazifalarni bajarish bo‘yicha kengashib olindi.